حد شاف كنيستي؟! بقلم اشرف جرجس
حد شاف كنيستي؟!
رسالة جاتلي هذا الصباح من صديق من الكنيسة الارثوذكسية الارمينية الشريكة معنا في ذات الإيمان..
يا جماعة فيه حد لسة فاكر كنيسة الإسكندرية غير هذا الغريب الجنس؟
كنيسة الإسكندرية, صاحبة المدرسة اللاهوتية, بنتينوس اللي عمل الأبجدية القبطية وترجم الإنجيل للقبطي هو وتلاميذه إكليمنضس وأوريجانوس, المدرسة الرائدة على العالم في اللاهوت, طيب اثناسيوس حامي الإيمان اللي انقذ المسكونة من الكفر الآريوسي, قانون الإيمان وتجسد الكلمة, طيب أنبا انطونيوس ابو الرهبان, انبا بولا أول السواح, انبا شنودة رئيس المتوحدين, حد فاكر البابا بطرس خاتم الشهداء اللي شاف ثوب المسيح ممزق بسبب الاريوسية وافتدى شعبة بدمة كراع صالح, طيب كيرلس الكبير أعظم من شرح لاهوت المسيح للعالم, الراجل اللي صوتة اتنبح وهو بيقول مايا فيزيس تو ثيئو لوغو سيساركوميني, طيب ديسقوروس اللي رفض طومس لاون بشجاعة, طيب صموئيل المعترف اللي اتخلعت عينة بسبب رفض الطومس, طيب ال 30 الف قبطي اللي استشهدوا رفضا للطومس, حد فاكر ال 3 مجامع الكبري, 318 أسقف في نيقية و150 في القسطنطينية و200 في أفسس, مجامع اهتزت ليها كنائس العالم وانتفض لها الاكليروس في المسكونة عشان احيانا حرف غلط في كلمة لاهوتية حساسة, طيب شهداء دقلديانوس اللي عطروا تراب مصر بدمائهم, يوليوس الاقفهصي أول مؤرخ للشهداء في العالم, شهداء اسنا والفيوم وأخميم, التلات فلاحين اللي استشهدوا بفاسهم, مكسيموس ودوماديوس اللي جم من القصر عالبرية, مكاريوس الكبير, موسى الأسود وأنبا بيشوي اللي حمل المخلص على أكتافة, طيب سمعان الخراز ونقل جبل المقطم بآية واحدة من الإنجيل, حد لسة فاكر انبا رويس وأنبا برسوم العريان, طيب سيدهم بشاي, البابا كيرلس الرابع أبو الاصلاح اللي اهتم بالتعليم والثقافة والتنوير, الأنبا ابرام اسقف الفيوم وابونا ميخائيل البحيري, حد لسة فاكر الأرشدياكون حبيب جرجس صاحب الصخرة الارثوذكسية, البابا كيرلس السادس وظهورات العدرا في الزيتون على قباب كنيستها اللي بتحبها, القمص منسى يوحنا العلامة, أبونا بيشوي كامل حامل الصليب وأبونا يوسف أسعد الراعي الحنون, حد فاكر أبونا يسطس الانطوني وابونا عبد المسيح المقاري, فاكرين أبونا عبد المسيح الحبشي اللي جه مصر حافي من الحبشة عشان يتمم تدبيرة وسط ولاد انطونيوس ومكاريوس, أنبا أغريغوريوس العلامة والبابا شنودة الثالث معلم المسكونة العظيم, تاماف ايريني حبيبة ابو سيفين, الناس دي راحت فين؟ حد لسة فاكرهم؟ مش هي دي كنيسة مصر اللي النهاردة بتمثل رسميا في طقوس ضد التقليد والإنجيل وتراث الآباء؟؟ حد شاف كنيستي وأبائي الاطهار؟ حد شاف الأساقفة الشجعان اللي كانوا مابيخافوش من النار والهنبازين والسيف؟ الناس اللي عمر ما كان لهم إيمان ربنا يسوع المسيح رب المجد في المحاباه..حد شاف كنيستي العظيمة؟
تعليقات
إرسال تعليق