يابنات ..عايزنها مساواة وألا إتيكيت وألا نمشيها مساكيت ؟

صدعتونا بحقوق المرأة والمساواة وجمعيات تتكون ومؤسسات تنعقد
ونادى سيدات الليونز اللى عاملين مشكلة مع المترودتيل صالح
لإن " البيفية " مافيهش "سيمون فيمية" ..!!
وستات فاضية مخصوووص علشان قضية المرأة
اللى ما عرفش هى أية بالظبط
حاجة كدة زى القضية الفلسطينية اللى تتوه فيها وماتعرفلهاش راس من رجلين

رصدت على نفسى سخسياً مشهد عجيب ..لو فتحت باب العمارة أو باب الأسانسير
ومعايا جارتى ...لازمن أخليها هى تخش الأول ..حتى لو كانت بنوتة نونو فى ابتدائى
فى مكتب الشهر العقارى كرسى واحد أدام الموظفة ..واللى تقعد عليه واحدة ست
وأنا أتنيل أفضل واقف ...طاب لية يعنى ؟!!
الكارثة ان أنا اللى باقولها أتفضلى حضرتك أقعدى..!


فى الأتوبيس أول مايفضى كرسى اللى تقعد هى الست مش الراجل ..!!
ولو واحدة مُنقبة يفضل الكرسى اللى جنب جنابها فاضى واللى تقعد عليه واحدة ست ..!!
فى أيتوها مصلحة حكومية فيه طابورين ..واحد ستات وواحد رجالة !!!
دة إتيكيت وألا مساواة وألا أية بالظبط ؟!!

مع أنه فى دول العالم الموتقدم طحن والذين يساوون المرأة بالرجل
تلقى طابور واحد يوحد الله ..
حتى فى المطارات فى طابور الجوازات ..ستات على رجالة
ولا سمعناش واحد خد تأشيرة "تحرش" أو خِتّم جوازات "هتك عِرض"
يعنى الدول دهيين معندهمش إتيكيت ...وعندهم مساواة ؟
وأحنا ماعندناش مساواة لكن عندنا إتيكيت ؟

على رأى شويكار فى مسرحية سيدتى الجميلة ( علمنى الكتاكيت )
فتعلمنا كلنا مع شويكار الكتاكيت ...ورددنا خلف زينات صدقى
يا ختشى كتاكيتو بنى

سؤال لبنت حواء
عايزين مساواة ...وألا إتيكيت ..وألا راجل أهبل يطبق الأتنين
ونبقى رجالة بنؤمن بالمساكيت ؟